Ragnar Már Garðarsson

Ragnar Már Garðarsson

Ragnar Már Garðarsson, fæddur 1995, ólst upp í Golfklúbbi Kópavogs og Garðabæjar. Hann varð Íslandsmeistari unglinga í holukeppni í flokki 13–14 ára árið 2009 og í höggleik í flokki 15–16 ára 2011 og 17–18 ára 2012. Árið 2013 varð hann Íslandsmeistari í holukeppni í flokki 17–18 ára. Yngri bróðir hans er Sigurður Arnar Garðarsson, sem einnig leikur á 2. stigi úrtökumótsins í haust.

Sumarið 2014 vann Ragnar tvö mót á Eimskipsmótaröðinni. Á Egils Gull-mótinu á Strandarvelli á Hellu í byrjun júní lék hann lokahringinn á 62 höggum, átta undir pari, og fékk níu fugla. Það var vallarmet, höggi betra en fyrra met Ólafs Björns Loftssonar. Ragnar vann mótið á 206 höggum, fjórum undir pari, fjórum höggum á undan Gísla Sveinbergssyni.

Hann lék tvö tímabil með McNeese State í Louisiana, 2013–2015. Besti árangur hans þar var jafnt 6. sæti á Wyoming Cowboy Classic, á sjö höggum undir pari. Síðustu tvö árin í háskóla lék hann með Louisiana-Lafayette og nam þar stærðfræði. Besti hringur hans í háskólagolfinu var 65 högg á SBC Fall Preview haustið 2015.

Í júní 2022 lék Ragnar á Thisted Forsikring Championship á Ecco Tour í Álaborg og var efstur Íslendinganna eftir fyrsta hring, á 69 höggum.

Á 1. stigi úrtökumóta DP World Tour á Seddiner See í Þýskalandi í september lék hann annan hringinn á 67 höggum, fimm undir pari, sem var besti hringur Íslendinganna þann daginn. Hann varð jafn í 14. sæti á fimm höggum undir pari. Nítján efstu komust áfram. Á 2. stigi leikur hann á Isla Canela Links við Huelva á Spáni 29. október – 1. nóvember, á sama velli og Dagbjartur Sigurbrandsson. Lokastigið fer fram í Tarragona 6.–11. nóvember.