Seldi golfföt á Opna bandaríska – keppir þar sjálfur á næsta ári

Andrew Bailey þekkir Opna bandaríska meistaramótið vel, en hefur hingað til staðið utan reipanna. Á hverju ári stendur hann vaktina í risastóru sölutjaldi mótsins, þar sem vinnuveitandi hans, golffatamerkið Holderness & Bourne, selur vörur sínar. Næsta sumar mætir hann á Pebble Beach sem keppandi.

Bailey, sem er 34 ára og frá Cleveland, vann U.S. Mid-Amateur á Lido-vellinum á Sand Valley í Wisconsin 1. október. Í 36 holu úrslitaleik sigraði hann Nate Smith, 43 ára kylfing frá Idaho, 5/4 og lék síðustu 17 holurnar án þess að fá skolla. Sigurinn veitir honum þátttökurétt á Masters-mótinu og Opna bandaríska á næsta ári.

Slysið í klettunum

Bailey lék háskólagolf með Cleveland State og stefndi á atvinnumennsku. Samkvæmt Golf Channel vann hann sér takmarkaðan keppnisrétt á kanadísku PGA-mótaröðinni vorið 2015 en lék þar aldrei. Þremur mánuðum síðar féll hann um sex metra í klettaklifri í Ohio og braut úlnliðinn svo illa að festa þurfti hann með tveimur plötum og ellefu skrúfum. Á smærri mótaröðum hafði hann þá unnið sér inn um 8.000 dali.

Hann sótti um að fá áhugamannaréttindin aftur árið 2016 og fékk þau ári síðar. Sjálfur segir hann slysið jafnvel hafa verið það besta sem fyrir hann kom. Á lokaárinu í háskóla hafði hann rekist á Holderness & Bourne á Facebook og haldið sambandi. Þar fékk hann síðar vinnu og er nú landssölustjóri með fjórtán sölumenn undir sér.

Ekki einn af „gömlu atvinnumönnunum“

Í sumar hefur verið deilt um atvinnumenn sem fá áhugamannaréttindin aftur, og að minnsta kosti tveir miðlar lýstu úrslitaleiknum sem viðureign tveggja fyrrverandi atvinnumanna. Það á við um Smith, sem vann eitt mót á þremur árum á Korn Ferry-mótaröðinni og lék eitt tímabil á PGA-mótaröðinni. Bailey á hins vegar engin mót að baki á þeim mótaröðum, samkvæmt gögnum PGA-mótaraðarinnar.

Árið var honum ekki auðvelt. Hann fór í axlaraðgerð í febrúar eftir snjóbrettaslys og lék aðeins í þremur áhugamannamótum á árinu. Á Opna bandaríska á Shinnecock Hills í júní laumaðist hann úr sölutjaldinu til að fylgjast með hinum 17 ára Miles Russell komast í gegnum niðurskurðinn.

Kveðjurnar hafa streymt inn eftir sigurinn. Samstarfskona hans hjá fyrirtækinu sendi honum þessa: „Ótrúlegt hvað sumir leggja á sig til að sleppa við sölutjaldið,“ í lauslegri þýðingu.

Bailey hefur tvisvar komið á Augusta National sem áhorfandi. Í apríl ekur hann þangað inn sem keppandi.