Chacarra tábrotinn en leikur á heimaslóðum í Madríd

Eugenio Chacarra rak fótinn í sófahorn í myrkrinu þegar hann fór fram úr um miðja nótt til að sækja sér vatn, viku fyrir Opna spænska. Bein í þriðju tá brotnaði og önnur tá skaddaðist líka, að sögn DP World Tour. Hinn 26 ára gamli Madrídarbúi hefur notið aðstoðar sjúkraþjálfara og læknis síðustu daga og hyggst leika á Club de Campo Villa de Madrid, skammt frá æskuslóðum sínum.

Mikið er í húfi. Chacarra vann tvö mót í röð fyrr á tímabilinu og kæmist í efsta sæti Race to Dubai með sigri í Madríd. Alls eru 20 Spánverjar á meðal keppenda. Mótið hefst á fimmtudag.