Skoska stjórnin hafnar golfvelli á Coul Links öðru sinni

Völlurinn átti að liggja í sandhólunum norðvestan við þorpið Embo, á svæði sem tilheyrir Loch Fleet-friðlandinu og verndarsvæði fugla við Dornoch-fjörð. Skipulagsfulltrúar stjórnvalda mátu það svo að skaði á sandhólagróðri og truflun á vetrarfuglum vægju þyngra en ávinningur af ferðaþjónustu og þeim um 400 störfum sem aðstandendur lofuðu. Ráðherrar féllust á það mat.

Bandaríski athafnamaðurinn Todd Warnock kynnti hugmyndina fyrst árið 2015. Ný umsókn var samþykkt 8–6 í skipulagsnefnd Highland Council í desember 2023, þvert á ráðleggingar embættismanna, en skoska stjórnin tók málið til sín í febrúar 2024.

Gordon Sutherland, forsvarsmaður Communities for Coul, samtakanna sem sóttu um leyfið, kallaði niðurstöðuna löðrung framan í lýðræðið í héraðinu og sagði ólíklegt að slíkt tækifæri gæfist aftur. RSPB Scotland og Scottish Wildlife Trust fögnuðu ákvörðuninni.