East Potomac: lögmenn ríkisins segja enga lokun ákveðna 15. nóvember

Trump hafði tilkynnt á sunnudag að vellinum yrði lokað 15. nóvember og að Tom Fazio hefði teiknað nýjan keppnisvöll. „Hverjum á ég að trúa, ykkur eða forseta Bandaríkjanna?“ spurði Ana Reyes dómari í þinghaldinu, sem stóð í um átta klukkustundir. Lögmennirnir svöruðu að hún ætti að trúa þeim. Kvöldið áður hafði hún hafnað kröfu ráðuneytisins um að hún viki sæti.

Reyes sagðist ætla að slá því föstu að um 430 tré hefðu verið felld vegna áforma um nýjan völl, en kvað ekki upp úrskurð að svo stöddu. Hún hefur ekki ákveðið hvort Doug Burgum innanríkisráðherra verði kvaddur fyrir dóm. Undir lok þinghaldsins vísaði hún til frétta um að henni hefðu borist líflátshótanir vegna málsins.

Stefnendur, minjaverndarsamtökin DC Preservation League og tveir kylfingar úr borginni, vilja að bann við trjáfellingu, sem nú er í gildi, verði framlengt þar til dómur fellur í málinu. Að óbreyttu fellur bannið úr gildi 26. október.