GM lokar Bakkakotsvelli fyrir veturinn á miðvikudag

Golfklúbbur Mosfellsbæjar hefur ákveðið að loka Bakkakotsvelli fyrir veturinn frá og með miðvikudeginum 14. október. Í tilkynningu á Facebook-síðu klúbbsins segir að mikið hafi rignt undanfarið og að völlurinn sé orðinn mjög blautur. Því vill klúbburinn gefa honum tíma til að jafna sig áður en vetur gengur í garð.

Að sögn klúbbsins hefur aðsókn að Bakkakoti verið mikil í allt sumar og völlurinn hefur verið í afbragðsstandi. Kylfingar með aukaaðild eða hálfa aðild að GM geta nú bókað rástíma á Hlíðavelli án endurgjalds, en hann er aðeins opinn félagsmönnum klúbbsins.