Golfklúbbur Mosfellsbæjar valdi Eiríku Malaiku og Kristján Karl kylfinga ársins

Alls mættu 110 iðkendur á hátíðina í Kletti 13. október. Fyrst var keppt í golfþrautum, síðan var pítsuhlaðborð og loks voru veittar viðurkenningar fyrir sumarið.

Eiríka Malaika varð Íslandsmeistari stúlkna 13–14 ára bæði í holukeppni og höggleik í sumar og vann höggleikinn á Þorláksvelli með níu högga mun. Kristján Karl varð í september stigameistari Unglingamótaraðar GSÍ í flokki pilta 17–18 ára. Hann vann þrjú mót í sumar, það fyrsta í Þorlákshöfn á 21 höggi undir pari, og varð annar á báðum Íslandsmótunum.

Elva Rún Rafnsdóttir og Ásgeir Páll Baldursson, sem vann Unglingaeinvígið á Hlíðavelli 14. september, voru valin efnilegust. Aron Sölvi Kristinsson fékk viðurkenningu fyrir mestar framfarir og Emil Darri Birgisson fyrir bestu ástundun. Andrea Líf Líndal hlaut háttvísisbikarinn. Æfingar hefjast aftur 3. nóvember.