Brennan upp í 20. sæti heimslistans og Chacarra kominn í hóp 50 efstu

Michael Brennan, sem vann Baycurrent Classic í Yokohama í gær, fór úr 33. sæti í það 20. á nýjum heimslista. Jacob Bridgeman, sem varð jafn í öðru sæti, hækkaði úr 20. sæti í það 17. og Keith Mitchell úr 76. sæti í það 59.

Spánverjinn Eugenio Chacarra, sem deildi öðru sætinu á Opna spænska mótinu, fór úr 55. sæti í það 50. Það skiptir máli því að fimmtíu efstu kylfingar listans í árslok fá boð á Masters-mótið. Grant Forrest, sigurvegarinn í Madríd, stökk úr 296. sæti í það 140.

Scottie Scheffler er áfram efstur, á undan Rory McIlroy og Matt Fitzpatrick.