Holt efstur í Virginíu og Hammer fallinn niður fyrir línuna

Ian Holt fékk átta fugla og einn skolla á The Federal Golf Club í Glen Allen í Virginíu á fimmtudag og er á sjö höggum undir pari eftir fyrsta hring. Holt er þrítugur Bandaríkjamaður, þriðji á stigalistanum og þegar öruggur um keppnisrétt á PGA-mótaröðinni. Hann hefur unnið tvö mót á tímabilinu, á Bahamaeyjum og í Panama, og sigur á sunnudag yrði sá þriðji.

Suður-Afríkumaðurinn Barend Botha lék á 65 höggum án skolla, seinni níu holurnar á 30 höggum, og er annar. Fimm eru jafnir í 3. sæti á fimm undir pari, þeirra á meðal Doc Redman og Caleb VanArragon.

Línan við 20. sætið

Tuttugu efstu menn stigalistans að mótinu loknu fá kort á PGA-mótaröðina. Samkvæmt útreikningum mótaraðarinnar færi VanArragon úr 24. sæti í það 18. ef staðan héldist og Botha úr 38. sæti í það 20. Botha þarf þó að ná öðru sætinu einn hið minnsta til að eiga möguleika.

Á móti kemur að tveir falla niður fyrir línuna. Cole Hammer hóf mótið í 20. sæti en lék á einu höggi yfir pari og félli niður í 25. sæti. Ben Kohles, sem var 19., er ekki með þar sem hann leikur á Baycurrent Classic í Japan. Þar lék hann annan hringinn á 62 höggum og er meðal efstu manna.

Sandy Scott, efsti maður stigalistans, er á tveimur höggum yfir pari. Ross Steelman er sá eini sem getur farið fram úr honum og myndi gera það ef staðan héldist, enda er hann á fjórum höggum undir pari. Efsta sætinu fylgir þátttökuréttur á Players-mótinu og Opna bandaríska meistaramótinu á næsta ári.

Annar hringur er leikinn á föstudag.