Íslenska golfið á netinu: hlaðvörpin, myndböndin og fólkið sem vert er að fylgjast með

Sá sem leitar að íslensku golfefni á YouTube finnur aðallega kennslumyndbönd sem flest eru orðin sex til sjö ára gömul: myndbönd Sturlu Höskuldssonar PGA-golfkennara um grip og æfingar og innslög Ragnhildar Sigurðardóttur úr sjónvarpsþáttunum Golfið. Efnið er gott, en enginn hefur tekið upp þráðinn og fjallað reglulega um íslenskt golf á YouTube.

Annars staðar er meira að gerast.

Hlaðvörpin

Seinni níu er líflegasta íslenska golfefnið sem við fundum. Logi Bergmann og Jón Júlíus Karlsson hafa sent frá sér yfir 130 þætti síðan 2024. Þeir ræða við skemmtilega kylfinga og taka sig mátulega alvarlega. Í nýjasta þættinum var Jói Fel gestur og talaði um blindar holur, sem eru í sérstöku uppáhaldi hjá honum.

Golfstöðin er af öðrum toga. Bjarni Már Ólafsson, sjúkra- og styrktarþjálfari kylfinga, fjallar um það hvernig kylfingar geta bætt sig án þess að meiðast. Hann rekur Golfstöðina í Glæsibæ, þar sem í senn eru golfhermar, líkamsrækt og sjúkraþjálfun. Í nýlegum þætti var gestur hans Edwin Roald, golfvallahönnuður og vallarstjóri í Þorlákshöfn.

Myndböndin frá klúbbunum

Best gerðu íslensku golfmyndböndin koma frá klúbbunum sjálfum. Golfklúbbur Vestmannaeyja lét fljúga yfir allar 18 holurnar á velli sínum, sem liggur í gömlum gíg. Golfklúbbur Kiðjabergs gerði myndband um sinn völl eftir að hann var valinn besti golfvöllur landsins hjá World Golf Awards 2024.

Á Instagram

Íslenskir kylfingar á Instagram eru fáir og fylgjendur þeirra sjaldnast fleiri en nokkur þúsund. Meðal þeirra sem hafa golfið í forgrunni eru Haraldur Franklín Magnús atvinnukylfingur, Valdís Þóra Jónsdóttir, sem lék á Evrópumótaröð kvenna, og Hlynur Geir Hjartarson, PGA-golfkennari og yfirþjálfari hjá Golfklúbbi Selfoss.

Þekkir þú íslenskan kylfing, golfkennara eða klúbb sem gerir gott golfefni? Sendu okkur póst á ritstjorn@golfid.is. Við fylgjumst með og fjöllum um þá bestu í þessum lið.