LPGA leikur um 147 milljónir dala árið 2027 og fer á Royal St George's

LPGA-mótaröðin kynnti á miðvikudag mótaskrá sína fyrir árið 2027. Mótin verða 33 og leikið verður um meira en 147 milljónir dala samanlagt, sem er met. Að sögn mótaraðarinnar hefur verðlaunaféð nærri tvöfaldast frá byrjun áratugarins.

Mesta athygli vekur að Opna breska kvennamótið, AIG Women’s Open, fer fram á Royal St George’s í Sandwich dagana 26. júlí til 1. ágúst. Völlurinn hefur haldið Opna breska mótið fimmtán sinnum en aldrei risamót kvenna.

Fimm risamót á nýjum og gömlum slóðum

Risamótatímabilið hefst að venju á Chevron-meistaramótinu, sem verður í annað sinn á Memorial Park í Houston, 19.–25. apríl. Opna bandaríska kvennamótið fer fram á Inverness Club í Toledo í Ohio og KPMG Women’s PGA á Congressional í Maryland, þar sem leikið verður um 13 milljónir dala, hæstu upphæðina á árinu. Evian-meistaramótið verður á sínum stað í Frakklandi í byrjun júlí.

Meðal nýjunga eru Futu Ladies World Championship á Clearwater Bay í Hong Kong í mars og tvær vikur í röð á Havaí: fyrst Nanea Cup á Nanea Golf Club í Kailua-Kona og svo LOTTE-meistaramótið, sem flyst á Plantation-völlinn á Kapalua. The Classic snýr aftur til Corning í New York-ríki, þar sem LPGA hefur ekki leikið síðan 2009, og verður með fimm milljóna dala verðlaunafé, það hæsta utan risamótanna og lokamótsins.

Minna flakk milli heimsálfa

Craig Kessler, framkvæmdastjóri LPGA, leggur áherslu á að mótin séu nú skipulögð þannig að leikmenn ferðist minna á milli heimshluta. Asíumótin eru í tveimur lotum, á Taílandi, í Singapúr og Hong Kong að vori og í Kína, Suður-Kóreu, Malasíu og Japan að hausti, og Evrópumótin þrjú eru leikin í einni lotu um mitt sumar. „Vellirnir sem við leikum á skipta máli,“ sagði Kessler, í lauslegri þýðingu.

Alþjóðlega liðakeppnin International Crown fer fram á Lake Merced í Kaliforníu í september, en Ástralía vann hana síðast, árið 2025. Tímabilið hefst á Tournament of Champions á Lake Nona í Flórída 1. febrúar og lýkur með CME Group Tour Championship á Tiburon í Naples 15.–21. nóvember, þar sem leikið verður um 11 milljónir dala.