Ruoning Yin vann í Sjanghæ með fuglum á 16. og 17. holu

Eftir 15 holur voru Yin og Choi jafnar á níu höggum undir pari. Yin fékk fugl á 16. holu og annan á 17. holu, sem er par 3. Choi fékk fugl á lokaholunni en Yin lék hana á pari og lauk keppni á 277 höggum á Sheshan-vellinum, ellefu höggum undir pari. Lokahringinn lék hún á 68 höggum.

Choi var efst eftir alla þrjá fyrstu hringina en fékk skolla á 7. og 8. holu á lokahringnum og lék hann á 71 höggi.

Þetta er sjöundi sigur Yin á LPGA-mótaröðinni og annar sigur hennar á árinu. Hún vann FM Championship á TPC Boston í ágúst. Mótið í Sjanghæ vann hún einnig árið 2024, þá á 25 höggum undir pari.

Amy Yang varð þriðja á átta undir pari og Rio Takeda fjórða á sjö undir pari. Carlota Ciganda, sem fékk tveggja högga víti fyrir hægan leik á laugardag, varð fimmta á sex undir pari. Jeeno Thitikul átti titil að verja og varð jöfn í 8. sæti.