Schauffele ver titilinn í Japan þar sem baráttan um keppnisréttinn harðnar

Eftir mótið í Utah um helgina færir PGA-mótaröðin sig yfir Kyrrahafið. Baycurrent Classic fer fram á Yokohama Country Club í Japan 8.–11. október og þar á Bandaríkjamaðurinn Xander Schauffele titil að verja.

Schauffele vann mótið í fyrra á 17 höggum undir pari. Hann lék lokahringinn á 64 höggum og var einu höggi á undan landa sínum Max Greyserman.

Sterkur hópur í Yokohama

Þótt mótið sé eitt haustmóta mótaraðarinnar, þegar margar stærstu stjörnurnar taka sér hlé, er hópurinn sterkur. Auk Schauffeles leika meðal annars Wyndham Clark, Collin Morikawa, Jacob Bridgeman, Justin Thomas, Keegan Bradley og Rickie Fowler. Jordan Spieth keppir í Japan í fyrsta sinn síðan 2019.

Heimamenn verða áberandi. Hideki Matsuyama fer fyrir hópi japanskra kylfinga, en meðal annarra eru Ryo Hisatsune, Takumi Kanaya og Keita Nakajima. Fjórir japanskir kylfingar fengu boðssæti, þar á meðal Kanaya, sem deildi fjórða sætinu á mótinu í fyrra.

Keppendur eru 72 og enginn niðurskurður. Verðlaunaféð nemur 8 milljónum dala og sigurvegarinn fær 1,44 milljónir.

Barist um kortin

Fyrir marga snýst vikan um annað en titilinn. Mótið er þriðja af átta mótum haustsins, þar sem ræðst hverjir halda fullum keppnisrétti á PGA-mótaröðinni á næsta ári. Mörkin liggja við 100. sæti FedEx-stigalistans og samkvæmt mótaröðinni eru nokkrir í hópnum á bilinu frá 99. til 106. sætis.

Völlurinn

Yokohama Country Club er par 71 og 6.695 metrar. Bill Coore og Ben Crenshaw endurhönnuðu völlinn árið 2015. Fyrir mótið í ár var 18. holan lengd úr 434 metrum í 441 metra, auk þess sem brautum á 2. og 15. holu var breytt og nýjum teigum bætt við.

Völlurinn getur gefið lág skor. Matt McCarty lék lokahringinn í fyrra á 60 höggum, sem er met á mótinu.

Vegna níu klukkustunda tímamismunar fer leikurinn að mestu fram að næturlagi að íslenskum tíma.