Vijay Singh vann SAS Championship 63 ára og Ernie Els varð annar

Vijay Singh frá Fídjieyjum lék á 207 höggum á Prestonwood-vellinum í Cary í Norður-Karólínu. SAS Championship er síðasta mót deildarkeppninnar á PGA Tour Champions og þetta var sjötti sigur hans á öldungamótaröðinni í 193 mótum.

Singh var jafn Tim O’Neal og Freddie Jacobson í efsta sæti fyrir lokahringinn á sunnudag. Hann fékk fugla á 9. og 10. holu og var þá kominn með þriggja högga forystu. O’Neal minnkaði muninn í eitt högg með fuglum á 12., 13. og 14. holu en fékk skramba á 17. holu, sem er par 5, og varð jafn fjórum öðrum í 5. sæti. Singh lék sex síðustu holurnar á pari.

Ernie Els lék lokahringinn skollalaust á 69 höggum og varð annar á sjö undir pari. Alex Cejka, sem vann mótið í fyrra, og Tag Ridings urðu jafnir í 3. sæti.

Aðeins Bernhard Langer hefur unnið mót á mótaröðinni eldri en Singh. Hann hafði ekki unnið þar síðan á Ally Challenge árið 2023 og lék nú í níunda sinn á SAS Championship. „Það er orðið dálítið langt síðan ég vann,“ sagði Singh eftir hringinn, samkvæmt Golf Today.

Með sigrinum fór hann úr 57. sæti í 33. sæti stigalistans um Charles Schwab-bikarinn. Þeir 72 efstu á listanum komast áfram í úrslitakeppnina, sem hefst í vikunni.