Hulda Clara leikur lokahringinn í Vidago í dag

Hulda Clara Gestsdóttir er jöfn í 41. sæti á fjórum höggum yfir pari fyrir lokahringinn á Super Bock Ladies Open á LET Access-mótaröðinni í dag. Hún var sú eina af þremur íslenskum keppendum sem komst í gegnum niðurskurðinn á Vidago Palace-vellinum í Portúgal. Lorna McClymont lék annan hringinn á 65 höggum án skolla og er með þriggja högga forystu á níu höggum undir pari.

• Veigar Heiðarsson varð jafn í 7. sæti á Bank of Tennessee Intercollegiate og lék lokahringinn á 70 höggum. ETSU varð í 4. sæti.
• Í Suður-Kóreu hófust tvö mót í nótt. Á Genesis Championship, síðasta móti DP World-mótaraðarinnar fyrir úrslitakeppnina, keppa 126 kylfingar um 4 milljónir dala og sigurvegarinn fær 835 stig á Race to Dubai-listanum. Á LPGA-mótaröðinni er leikið á BMW Ladies Championship í Haenam.
• Butterfield Bermuda Championship á PGA-mótaröðinni hefst á Port Royal-vellinum í dag.
• Grafarholtsvelli verður lokað fyrir veturinn á laugardag.