GR í 8. sæti á Evrópumóti golfklúbba í Bordeaux

Eftir tvo hringi var sveitin í 5. sæti ásamt tveimur öðrum klúbbum. Tvö bestu skor af þremur töldu hvern dag. Sveitin lék lokahringinn á 149 höggum, sjö höggum yfir pari, og lauk keppni á 440 höggum samtals. Jóhann Frank Halldórsson lék best GR-inga á lokahringnum, á 74 höggum.

Böðvar Bragi Pálsson átti besta hring sveitarinnar í Frakklandi, 70 högg á föstudag, og lauk keppni á níu höggum yfir pari. Jóhann Frank var á 11 höggum yfir pari og Arnór Tjörvi Þórsson á 12. GR vann sér þátttökurétt á mótinu með sigri í 1. deild karla á Íslandsmóti golfklúbba á Strandarvelli á Hellu í ágúst. Sveitin lagði GKG 5–0 í úrslitaleiknum. Í fyrra varð GR í 6. sæti á sama velli.