Nesvöllur opinn áfram en boltavélinni lokað á sunnudag

Félagsmenn Nesklúbbsins geta enn leikið inn á flatir og af teigum á Nesvelli. Skrá þarf sig á rástíma en ekki þarf að staðfesta komu, samkvæmt vef klúbbsins. Ef loka þarf vellinum með stuttum fyrirvara, til dæmis vegna frosts, verða bókaðir tímar afbókaðir.

Í næstu viku verður vatni blásið úr vökvunarkerfinu og öðrum lögnum fyrir veturinn. Boltavélin er því opin til og með sunnudeginum 11. október, en eftir það mega kylfingar slá eigin boltum á æfingasvæðinu.

Golfskálanum og veitingasölunni var lokað 30. september. Salernin í skálanum verða aðeins opnuð þegar margir eiga bókaða rástíma, þar sem óboðnir gestir hafa komið inn í mannlausan skálann, en salernið við 5. teig er opið áfram.