Jon Rahm laus undan LIV og má semja við hvaða mótaröð sem er

Samkvæmt samkomulaginu, sem Golf Channel greinir frá, ber Rahm engar frekari skyldur gagnvart LIV. Hann getur samið við hvaða mótaröð, deild eða styrktaraðila sem er án þess að spyrja deildina leyfis. Hann fær aftur full yfirráð yfir nafni sínu og ímynd, auk vörumerkjanna „RAHMBO“ og „Legion XIII“, en svo heitir liðið sem hann lék með í LIV. Viku fyrr hafði lögmaður hans tilkynnt dómstólnum að Rahm yrði ekki með í LIV Golf 2.0.

Þegar LIV fór í gjaldþrotameðferð 8. september skuldaði deildin honum 7,5 milljónir dala og samkvæmt gögnum málsins er hann stærsti ótryggði kröfuhafi hennar.

Forráðamenn PGA-mótaraðarinnar hafa sagt að viðræður um endurkomu LIV-kylfinga hefjist ekki fyrr en þeir sýni fram á að engir samningar bindi þá lengur við LIV. Mótaröðin gæti nú opnað aftur sömu endurkomuleið og Brooks Koepka fór í ár. Hinn kosturinn er að Rahm leiki á DP World Tour árið 2027, taki þannig út eins árs bann og snúi aftur til PGA-mótaraðarinnar 2028.

Fyrsta mót Rahms eftir viðskilnaðinn verður Abu Dhabi Aldar Championship á Yas Links 5.–8. nóvember. Aðrir LIV-kylfingar þurfa að tilkynna fyrir 25. október hvort þeir verði áfram í deildinni.