Ísland hefur leik á heimsmeistaramóti stúlkna í Kanada

Íslenska stúlknalandsliðið er komið til Kanada, þar sem heimsmeistaramót stúlkna fer fram á Brampton-vellinum í Ontario dagana 30. september til 3. október.

Fyrir Íslands hönd keppa Bryndís Eva Ágústsdóttir (GA), Embla Hrönn Hallsdóttir (GKG) og Lilja Maren Jónsdóttir (GA). Þjálfari er Andri Þór Björnsson, aðstoðarafreksstjóri GSÍ.

Fyrirkomulagið

Leikinn er 72 holu höggleikur, 18 holur á dag, bæði í einstaklings- og liðakeppni. Í liðakeppninni telja tvö bestu skor hvers liðs á hverjum hring. Alls taka 24 lið frá 23 þjóðum þátt, þar sem Kanada sendir tvö lið.

Þetta er fjórða árið í röð sem Ísland tekur þátt. Besti árangurinn til þessa er 16. sæti, sem náðist í fyrra. Sigurvegarinn í einstaklingskeppninni fær þátttökurétt á CPKC Women’s Open á LPGA-mótaröðinni árið 2027.