Fjóla Margrét Viðarsdóttir

Fjóla Margrét Viðarsdóttir

Fjóla Margrét Viðarsdóttir úr Golfklúbbi Suðurnesja vann sína fyrstu Íslandsmeistaratitla sumarið 2021. Þá sigraði hún bæði í holukeppni og höggleik í flokki 14 ára og yngri og varð auk þess stigameistari flokksins á unglingamótaröð GSÍ. Ári síðar varð hún Íslandsmeistari í holukeppni 15–16 ára á Hlíðavelli í Mosfellsbæ, þar sem úrslitaleikurinn gegn Auði Bergrúnu Snorradóttur úr GM réðst ekki fyrr en á 19. holu. Í júlí 2022 keppti hún á The Junior Open í Skotlandi.

Í ágúst 2025 vann Fjóla Margrét stúlknaflokk 17–18 ára á Íslandsmóti unglinga í höggleik á Þorláksvelli. Hún lék á tveimur höggum undir pari og tryggði sér titilinn með fuglum á 16. og 17. holu lokahringsins. Pamela Ósk Hjaltadóttir úr GM var fjórum höggum á eftir henni. Nokkrum vikum síðar var ljóst að Fjóla Margrét var stigameistari flokksins með 4.940 stig. Hún lék á öllum sjö mótum tímabilsins, vann tvö þeirra og endaði aldrei neðar en í áttunda sæti.

Sumarið 2026 var hún í fremstu röð á mótaröð GSÍ. Hún varð önnur á Reykjanesmótinu í maí og jöfn í þriðja sæti á Korpubikarnum á tveimur höggum yfir pari, eftir að hafa deilt forystunni að loknum fyrsta hring. Á Íslandsmótinu í holukeppni kvenna á Urriðavelli í júní komst hún í undanúrslit en tapaði leiknum um þriðja sætið fyrir Perlu Sól Sigurbrandsdóttur. Hún var í kvennalandsliðinu sem endaði í 16. sæti á Evrópumóti landsliða á Írlandi í júlí. Í leiknum um 15. sætið gegn Belgíu vann hún fjórmenningsleik sinn ásamt Guðrúnu Jónu Nolan Þorsteinsdóttur, 4/2. Hún varð þriðja á stigalista GSÍ með 2.838 stig.

Idaho-háskóli tilkynnti í nóvember 2025 að Fjóla Margrét hefði skrifað undir hjá skólanum. Þar kom fram að hún hefði útskrifast sem dúx úr framhaldsskóla og stefndi á nám í vélaverkfræði. Hún hefur leikið á öllum þremur mótum Idaho haustið 2026. Á Kalispel Invitational í Spokane í september lék hún á 76, 86 og 78 höggum. Á Pat Lesser Harbottle Invitational á Tacoma Country and Golf Club í Lakewood í Washington-ríki í október varð hún jöfn í 75. sæti á 17 höggum yfir pari. Idaho leikur næst á Golf Iconic Classic í Las Cruces í Nýju-Mexíkó 12.–14. október.