Andrew Novak vann Mexico Open með fimm högga mun

Novak hafði sex högga forskot fyrir lokahringinn á Vidanta Vallarta. Á fyrri níu holunum fékk hann engan fugl, þótt hann ætti tvö fuglapútt innan við þrjá metra. Á 3. holu, sem er par 5, stakkst annað högg hans í glompubarminn við flötina. Hann varð að slá boltann niður í glompuna en bjargaði pari. Eftir skolla á 10. holu var forskot hans á Steven Fisk og Kristoffer Ventura komið niður í þrjú högg, en þeir léku báðir á 63 höggum án skolla.

Á 12. holu, sem er einnig par 5, sló Novak úr glompu rúman metra frá holu og fékk fugl. Á 13. holu fékk hann annan fugl með tveimur púttum og á þeirri 14. setti hann niður um 13 metra pútt. „Þá róaðist allt,“ sagði hann í viðtali við vef PGA-mótaraðarinnar. Hann lék á 69 höggum og samtals á 259. Á föstudag jafnaði hann vallarmetið með 61 höggi. Samkvæmt Golf Channel eru bæði 259 högg og fimm högga sigurmunur mótsmet.

Novak er 31 árs og eini sigur hans til þessa var á Zurich Classic í fyrra, liðakeppni sem hann vann með Ben Griffin. Griffin varð jafn Mackenzie Hughes í 4. sæti í gær. Fyrir sigurinn fékk Novak 1.080.000 dali og hann fór úr 89. sæti stigalista haustmótanna í það 53. Þar með er hann svo gott sem öruggur um sæti á tveimur af stærstu mótum næsta árs, á Pebble Beach og Riviera, þar sem keppt er um 20 milljónir dala.

Ventura fæddist í Puebla í Mexíkó, á norska móður og flutti til Noregs tólf ára gamall. Hann var í 108. sæti stigalistans fyrir mótið en er nú í 76. sæti og heldur keppnisrétti sínum, sem 100 efstu halda. Við Golf Channel sagðist hann hafa verið búinn að sætta sig við að missa keppnisréttinn. Tom Kim og Brian Campbell, sem fengu tveggja högga víti á föstudag fyrir að slá hvor annars bolta, urðu jafnir í 6. sæti á 18 undir pari.

Hughes fór úr 118. sæti í það 101. Þrjú mót eru eftir af haustmótaröðinni og það fyrsta, World Wide Technology Championship, hefst í Cabo San Lucas á fimmtudag.