Sigurður Arnar, Dagbjartur og Ragnar Már komust ekki á lokastigið

Sigurður Arnar fékk skolla á 1. holu lokahringsins á Fontanals-vellinum í Girona og tapaði svo fjórum höggum á 5., 6. og 8. holu, og fékk skramb á þeirri síðustu. Fuglar á 3. og 7. holu dugðu skammt og seinni níu holurnar lék hann á pari. Hann endaði á fjórum undir pari, jafn í 33. sæti og fjórum höggum frá 20. sæti, sem var það síðasta sem gaf keppnisrétt á lokastiginu.

Á Isla Canela við Huelva byrjaði Dagbjartur Sigurbrandsson lokahringinn á tveimur skollum en fékk svo þrjá fugla og lék á einu undir pari. Hann lauk keppni á átta undir pari, jafn í 34. sæti og einnig fjórum höggum frá 20. sæti. Ragnar Már Garðarsson, sem lék fyrsta hringinn á sama velli á 67 höggum, lék lokahringinn á pari og var á þremur yfir pari í heildina, jafn í 71. sæti.

Lokastigið hefst á Infinitum í Tarragona á föstudag. Síðastur Íslendinga til að komast þangað var Haraldur Franklín Magnús árið 2023, að því er fram kemur á Kylfingi.is.