Golfvikan: Dagbjartur, Ragnar Már og Sigurður Arnar á úrtökumóti á Spáni

Dagbjartur úr GR og Ragnar Már úr GKG leika á Isla Canela Links við Huelva í Andalúsíu en Sigurður Arnar á Fontanals-vellinum í Girona. Leiknar eru 72 holur til sunnudags. Lokastigið fer fram á Infinitum-vellinum í Tarragona 6.–11. nóvember.

Fyrstu daga vikunnar keppa háskólalið með Íslendinga innanborðs í Flórída, New York og á Havaí. Berglind Erla Baldursdóttir leikur sem fimmti maður í liði Keiser á Flagler Fall Slam á Marsh Creek-vellinum í St. Augustine í Flórída, þar sem 36 holur eru leiknar í dag og 18 á morgun. Keiser er í 2. sæti styrkleikalista NAIA-háskóla. FIU, lið Auðar Bergrúnar Snorradóttur, heldur Pat Bradley Invitational í Miami Lakes í dag og á morgun. Manhattan, lið Róberts Leós Arnórssonar, leikur í New Rochelle í New York. Á Maui hófst Ka‘anapali Classic í gær. ETSU, lið Veigars Heiðarssonar, er efst á styrkleikalista þeirra 20 liða sem keppa þar. ETSU, FIU og Manhattan höfðu ekki birt liðsskipan sína í morgun. Western Illinois, lið Birnu Rutar Snorradóttur, leikur á Western Cup í Macomb í Illinois á föstudag og laugardag.

Mexico Open á PGA-mótaröðinni fer í fyrsta sinn fram að hausti, dagana 29. október–1. nóvember, á Norman-vellinum á Vidanta Vallarta við Kyrrahafsströndina. Brian Campbell á titil að verja. Keppt er um sæti meðal 100 efstu á stigalista haustmótanna, en þau sæti gefa keppnisrétt á mótaröðinni 2027. Fyrst ræðst Bermuda Championship í bráðabana Séamusar Powers og Austins Smothermans kl. 12 í dag.

Hlé er á DP World Tour fram að úrslitakeppninni, sem hefst á Abu Dhabi Championship 5. nóvember. Á Alcanada-vellinum á Mallorca leika 45 efstu menn stigalista HotelPlanner-mótaraðarinnar á lokamótinu, Grand Final, frá fimmtudegi til sunnudags. Fimmtán efstu á listanum að mótinu loknu fá keppnisrétt á DP World Tour.

LPGA-mótaröðin heldur Maybank Championship í Kuala Lumpur, þar sem verðlaunaféð er þrjár milljónir dala og Miyu Yamashita á titil að verja. Á LET-mótaröðinni er leikið á Wistron Ladies Open á Sunrise-vellinum í Taívan. Yani Tseng vann þar í fyrra. Á PGA Tour Champions vann Rory Sabbatini fyrsta mót úrslitakeppninnar í St. Louis í gær og 54 kylfingar halda áfram á Simmons Bank Championship í Little Rock.