Rory Sabbatini lék á 62 höggum og vann Stifel Charity Classic

Sabbatini, sem keppir fyrir Slóvakíu og varð fimmtugur í apríl, lék Norwood Hills-völlinn á níu höggum undir pari. Hann vippaði í holu úr karganum fyrir erni á 15. braut, jafnaði við Darren Clarke með fugli á 16. og fékk svo fugl á tveimur síðustu holunum, þann síðari með löngu pútti á 18. flöt. Hann lauk leik á 14 undir pari, höggi á undan Clarke. Henrik Stenson, Steven Alker og Mario Tiziani urðu jafnir í 3. sæti á 12 undir pari.

Mótið var það fyrsta af þremur í úrslitakeppninni um Charles Schwab-bikarinn. Samkvæmt útreikningum mótaraðarinnar fer Sabbatini úr 23. sæti stigalistans í 7. sæti. Af 72 kylfingum halda 54 áfram á Simmons Bank Championship í Little Rock í Arkansas í vikunni.