Dustin Johnson og LIV-kylfingar krefja PIF um yfir 100 milljónir dala

Kylfingarnir telja sig eiga inni meira en 100 milljónir dala í ógreiddum samningsgreiðslum, að sögn The Athletic. Bubba Watson og Thomas Detry frá Belgíu eru í hópnum. Lögmaður hópsins er David Cornwell, sem hefur lengi verið lögmaður Johnsons og var áður framkvæmdastjóri liðs hans, 4Aces. Hann segir kylfingana hafa treyst ítrekuðum loforðum sjóðsins þegar þeir tóku ákvarðanir sem breyttu ferli þeirra.

Enginn þeirra ætlar að skrifa undir samkomulag LIV og BC Partners um endurskipulagningu deildarinnar eins og það liggur fyrir, en frestur kylfinga til að skuldbinda sig til að leika í LIV Golf 2.0 rennur út í dag. PIF lítur svo á að sjóðurinn sé hluthafi og beri ekki ábyrgð á greiðslum samkvæmt samningunum. LIV gerir ráð fyrir að kröfurnar verði útkljáðar fyrir gjaldþrotadómstólnum í New Jersey, en þar eiga kylfingar sjö af tíu stærstu ótryggðu kröfunum.

Bryson DeChambeau fer fyrir öðrum hópi leikmanna í málinu og starfar ekki með Johnson og Cornwell. Í dómsskjölum kemur fram að æðstu stjórnendur LIV fengu samtals yfir 15,6 milljónir dala í hollustugreiðslur áður en deildin fór í greiðsluskjól í september, þar af fékk Scott O’Neil framkvæmdastjóri um 6,4 milljónir.