Good Good hálfnað: sjö högga sigur í versta bolta í New Jersey

Good Good-hópurinn lagði af stað frá Alaska 28. september og ætlar að leika golf í öllum 50 ríkjum Bandaríkjanna á 50 dögum. Þátturinn sem kom út á fimmtudag, 22. október, er sá 25. og ferðin því hálfnuð. Leikið var á Ramsey Golf & Country Club í New Jersey, 18 holna velli sem var opnaður árið 1995.

Sexmenningarnir skiptu sér í tvö þriggja manna lið og léku versta bolta: allir slá, liðið velur lakasta höggið og allir leika næsta högg þaðan.

Völlurinn er þröngur, skrifar Tim Corlett í samantekt á Forbes, og Matt Scharff lenti hvað eftir annað í torfærum á fyrstu holunum. Lið Garretts Clark lenti undir strax á fyrstu holu og munurinn var orðinn fimm högg eftir fjórar holur. Hitt liðið, Matt Meneghetti (Ghetti), Bubbie Broders og Blake Mullen, náði meira að segja fugli með versta boltanum og vann með sjö höggum.

Fyrstu holuna á Ramsey má leika niður brekku sem par 4 eða í hina áttina sem par 5. Bubbie hrósaði vellinum og nefndi lækinn sem liggur umhverfis völlinn og skilur hann frá íbúðabyggðinni.

Hópurinn gefur hverjum velli einkunn frá 0 til 100 og Ramsey fékk 82. Í lýsingu þáttarins á YouTube eru einkunnir ríkjanna sem komin eru. Maine er efst með 96 og Vermont næst með 95,8. Norður-Dakóta rekur lestina með 72,5.

Fyrr í mánuðinum fjölluðum við um hópinn sem stendur að Good Good. Ferðinni lýkur um miðjan nóvember. Næsti þáttur, sá 26., frá Delaware, er þegar kominn út.