Internet Invitational snýr aftur á mánudag og verðlaunaféð fjórfaldast

Barstool Sports og YouTube-rásin Bob Does Sports standa að mótinu og Dave Portnoy, eigandi Barstool, er gestgjafi. Í fyrra kepptu 48 um eina milljón dala sem sigurliðið skipti á milli sín. Nú eru keppendur 64 og sigurliðið fær fjórar milljónir dala. Til samanburðar er keppt um eina milljón dala á lokamóti Your Golf Tour í Las Vegas.

Samkvæmt Golf Digest var aftur leikið á Big Cedar Lodge í Ozark-fjöllum í Missouri. Á keppendalistanum, sem mótið birti í síðustu viku, eru meðal annars Rick Shiels, Peter Finch, Ryan Ruffels, Bryan-bræðurnir Wesley og George, Grant Horvat og Garrett Clark úr Good Good. Nýir í hópnum eru Johnny Manziel, sem hlaut Heisman-verðlaunin í bandarískum háskólaruðningi, körfuboltamaðurinn Jason Williams, UFC-bardagamaðurinn Justin Gaethje og Tyler Toney úr Dude Perfect.

Í fyrra var leikið í liðum, ýmist með Texas scramble eða fjórmenningi, og helmingur keppenda féll úr leik í hverri umferð. Í 18 holna úrslitaleik unnu Brad Dalke, Francis Ellis og Cody Franke þau Paige Spiranac, Frankie Borrelli og Malosi Togisala þegar vipp Borrellis á lokaholunni fór yfir flötina og út í vatn. Í sama leik sakaði Finch Spiranac um að hafa troðið niður grasið fyrir framan bolta Togisala í karganum, og lið hennar tapaði holunni. Franke lést áður en þættirnir voru sýndir. Dalke, Ellis, Spiranac, Borrelli og Togisala eru öll með aftur.

Þættirnir verða sex og koma út á mánudögum og fimmtudögum á rásum Fore Play, Bob Does Sports og mótsins sjálfs. Fyrstu tveir þættirnir verða birtir klukkan 17 að íslenskum tíma. Eftir að klukkunni verður seinkað í Bandaríkjunum 1. nóvember koma þættirnir út klukkan 18. Lokaþátturinn kemur út fimmtudaginn 12. nóvember.