Internet Invitational: Big John tryggði liði Ruffels sigur í bráðabana

Dave Portnoy, eigandi Barstool Sports og gestgjafi Internet Invitational, vildi ekki fá John Melstrom á mótið. Melstrom, sem er kallaður Big John, komst samt í lið Ryans Ruffels. Í öðrum þætti mótsins, sem kom út á fimmtudag, setti hann niður púttið sem felldi lið Peters Finch úr keppni.

Þátturinn er rúmar fjórar klukkustundir og birtist á YouTube-rás Bob Does Sports. Innan sólarhrings var áhorfið komið í nærri þrjár milljónir. Hann sýnir síðari hluta fyrsta keppnisdagsins á Big Cedar Lodge í Missouri, þar sem 64 kylfingar í fjórum liðum keppa um fjórar milljónir dala. Um morguninn var leikinn Texas scramble en síðdegis fjórmenningur og lék hvert par níu holur.

Lið Wesleys Bryan vann lið Brads Dalke. Bryan og félagar voru 6–2 yfir eftir morguninn. Dalke, sem vann mótið í fyrra, er úr leik ásamt öllu 16 manna liði sínu. Francis Ellis, sem vann með Dalke í fyrra, féll líka úr leik, enda var hann í liði Finch.

Lið Ruffels var undir eftir morguninn en jafnaði síðdegis, og því var leikinn bráðabani í fjórmenningi. Félli hola á jöfnu tóku ný pör við. Á fyrstu holunni mættust Finch og Luke Kwon annars vegar og Ruffels og Micah Morris hins vegar. Kwon setti niður rúmlega metra langt pútt og holan féll á jöfnu.

Á næstu holu léku Roger Steele og Rick Shiels fyrir lið Finch en Big John og Grant Horvat fyrir lið Ruffels. Horvat hafði sagt Ruffels að hann væri óöruggur með leik sinn þann daginn en Ruffels valdi hann samt. Steele sló inn á braut og Shiels átti um 90 metra eftir, en teighögg Big Johns fór í brautarglompu. Horvat sló úr glompunni inn á flöt, um sex metra frá holu, og innáhögg Shiels stöðvaðist aðeins fjær. Steele púttaði fyrstur og boltinn stöðvaðist við holuna. Big John setti fuglapúttið niður með Reaper-pútternum sínum og lið Ruffels komst áfram.

Ruffels og félagar mæta liði Bryans í þriðja þætti, sem kemur út mánudaginn 2. nóvember klukkan 18 að íslenskum tíma. Í honum eru 32 kylfingar eftir.

Fyrr um daginn, á 11. holu, sem er par 5, leituðu Malosi Togisala og Kwon að bolta í þykkum karga. Kevin Kisner, sem lék lengi á PGA-mótaröðinni, og Dan „Big Cat“ Katz, sem skera úr vafaatriðum á mótinu, komu að. Boltinn fannst og Kisner benti á að leitin mætti aðeins standa í þrjár mínútur. Leitartíminn var styttur úr fimm mínútum þegar golfreglunum var breytt árið 2019.