Dómari samþykkti fjármögnun LIV og leysti deildina undan samningum 19 kylfinga

Með samkomulaginu fær LIV 300 milljónir dala í lánsfé og hlutafé. Það er forsenda þess að deildin geti starfað áfram þegar fjárframlög sádi-arabíska fjárfestingarsjóðsins PIF falla niður í lok tímabilsins. Michael B. Kaplan dómari tók fram að með þessu staðfesti hann hvorki endurskipulagningaráætlun né úrskurðaði um kröfur. Hann féllst líka á beiðni LIV um að losna undan samningum 19 kylfinga, þar á meðal Brysons DeChambeau og Dustins Johnson, en það er venjan í málum af þessu tagi.

Robert Fitzgerald, lögmaður LIV, sagði fyrir dómi að DP World Tour reyndi greinilega að trufla viðræður LIV við leikmenn og endurskipulagninguna sjálfa með því að útiloka kylfinga sem semdu við nýju deildina einmitt nú. Kaplan sagði að ummæli forsvarsmanna mótaraðarinnar vektu áhyggjur, samkvæmt Golf Channel.

Málið verður næst tekið fyrir 20. október. Leikmenn hafa frest til 25. október til að semja við LIV Golf 2.0, en BC Partners getur framlengt frestinn og ákveður sjálft hve marga kylfinga og hverja þarf til að af nýju deildinni verði.