Hulda Clara Gestsdóttir jöfn í 37. sæti í Vidago

Hulda Clara fór upp um fjögur sæti á lokadeginum á Vidago Palace-vellinum í Portúgal og var samtals á 222 höggum. Fyrir mótið var hún í níunda sæti stigalista LET Access, tveimur sætum frá sjöunda sætinu, sem tryggir keppnisrétt á LET-mótaröðinni.

Ellie Gower frá Englandi lék á 67 höggum og sigraði á átta höggum undir pari, tveimur höggum á undan Billie-Jo Smith. Gower fékk örn á 17. holu, sem er par 5, og náði þá fjögurra högga forystu. Lorna McClymont, sem var efst með þriggja högga mun fyrir lokahringinn, lék á 76 höggum og varð þriðja. Gower hefur nú unnið tvö mót á LET Access og er komin í hóp 20 efstu á stigalistanum.

Tvö mót eru eftir af tímabilinu, það næsta í Girona á Spáni 12.–14. nóvember.