McIlroy segir LIV hafa ætlað að ganga af Evrópumótaröðinni dauðri

Guy Kinnings, framkvæmdastjóri DP World Tour, ræddi við The Scotsman á þriðjudag. Hann sagði að LIV hefði varið meira en sjö milljörðum dala og að eitt markmiðanna hefði verið að ganga af mótaröðinni dauðri. Þetta kvaðst hann hafa eftir mörgum sem forsvarsmenn LIV hefðu rætt við. Á þessu sagði hann reglur DP World Tour um aðild og boðsæti árið 2027 byggjast: leikmenn verði að velja á milli LIV og mótaraðarinnar.

McIlroy brást við orðum Kinnings á blaðamannafundi á Yas Links, þar sem Abu Dhabi Aldar Championship hefst á fimmtudag. „Ég er sammála öllu sem Guy sagði. Þeir fóru um Augusta í vor og sögðust ætla að ganga af Evrópumótaröðinni dauðri,“ sagði hann. LIV hefði tekið leikmenn og styrktaraðila af mótaröðunum, hleypt af stað vígbúnaðarkapphlaupi og skapað gervihagkerfi í karlagolfinu. Um miðjan október sagðist McIlroy hins vegar vilja fá LIV-kylfingana heim og kvaðst myndu greiða atkvæði með endurkomu þeirra.

Hann viðurkenndi að allir atvinnukylfingar þénuðu meira vegna LIV og sagði að Jack Nicklaus og kynslóð hans hefðu viljað fá slíka deild á sínum tíma. Nú þyrfti að stokka spilin upp svo að mótaraðirnar yrðu enn til eftir 50 ár.

Scott O’Neil, framkvæmdastjóri LIV, hefur frá því í ágúst sagt að deildin vilji starfa við hlið mótaraðanna. Lee Westwood, sem sagði sig úr DP World Tour skömmu eftir að hann gekk til liðs við LIV, greindi frá því í hlaðvarpinu Chipping Forecast að hann hefði ekki skrifað undir samning við nýju deildina, LIV 2.0. Ætli hann að snúa aftur á mótaröðina árið 2027 þarf hann að tilkynna það fyrir 12. nóvember og tekur þá út tíu móta bann.