Jon Rahm myndi líklega þiggja sama samning og Koepka

Jon Rahm sat fyrir svörum á Yas Links á þriðjudag, í fyrsta sinn síðan hann sagði skilið við LIV Golf. „Eins og staðan er núna veit ég hreinlega ekki hvernig árið 2027 verður hjá mér,“ sagði hann.

Rahm hefur ekki talað við PGA-mótaröðina og segist ekki geta það fyrr en allt sem varðar viðskilnaðinn við LIV er frágengið. Spurður hvort hann myndi þiggja sams konar samning og Brooks Koepka fékk í janúar svaraði hann: „Mjög líklega, já.“ Hann sagðist þó stórefast um að sér byðist það sama. Koepka greiddi fimm milljónir dala til góðgerðarmála, fær ekki aðild að eignarhlutakerfi leikmanna í fimm ár og boðsætum hans eru settar skorður. Rahm, Bryson DeChambeau og Cameron Smith stóð sama leið til boða en enginn þeirra þáði hana áður en fresturinn rann út 2. febrúar. Brian Rolapp, framkvæmdastjóri PGA-mótaraðarinnar, sagði í september að ekki stæði til að opna þá leið aftur, og Rahm nefndi sjálfur að hann gæti þurft að taka út eins árs bann.

Hann segist viss um að mega leika á DP World Tour og fái hann ekki að snúa aftur til PGA-mótaraðarinnar ætlar hann að leika þar heilt tímabil. Hann er byrjaður að skoða mótaskrána. Breytingarnar sem fylgdu LIV Golf 2.0 sagði hann ekki hafa hugnast sér.

Rahm hefur ekki keppt í sjö vikur og eignaðist fjórða barn sitt í millitíðinni. Hann hefur aldrei leikið á Yas Links. Abu Dhabi Aldar Championship hefst á fimmtudag og er fyrsta mót úrslitakeppni DP World Tour en 50 efstu á Race to Dubai-listanum komast á lokamótið í Dubai.