Smáauglýsingar golfhaustsins: logn óskast, sveiflan týnd

Þegar völlunum er lokað fer golfdótið í sölu. Pútterinn sem brást í ágúst er kominn á netið fyrir mánaðamót og seljandinn farinn að sjá eftir honum áður en fyrsta tilboðið berst. Svona gæti smáauglýsingadálkur kylfinga litið út síðasta föstudaginn í október.

Til sölu

Dræver, 460 cc, lítið notaður. Hefur ekki séð braut síðan í júní. Selst vegna ósættis. Verð samkomulag.

Pútter. Hefur fengið að heyra það oftar en nokkur annar hlutur á heimilinu. Fæst gegn því að hann flytji í annað sveitarfélag.

Rafknúin golfkerra. Fer beint. Eigandinn gerði það ekki.

Golfskór, vatnsheldir samkvæmt kassanum. Seljandi getur vitnað um annað.

Óskast

Logn. Í tvær klukkustundir, helst á laugardagsmorgni í júlí. Staðsetning skiptir ekki máli, en Suðurnes kæmu skemmtilega á óvart.

Rástími kl. 8.30 á laugardegi. Í skiptum býðst rástími kl. 14.20 á þriðjudegi og rafknúin golfkerra (sjá ofar).

Fjórði maður í holl á miðvikudögum. Má ekki vera betri en við hinir, en heldur ekki svo slakur að við þurfum að bíða eftir honum.

Meðspilari sem hrósar teighögginu án þess að bæta við „en“.

Tapað

Sveiflan. Sást síðast á æfingasvæðinu 14. júlí, þegar hún gekk eins og í sögu í hálftíma. Finnandi er vinsamlegast beðinn að skila henni fyrir vorið. Fundarlaun í boði.

Gefins

Golfráð í ótakmörkuðu magni. Afhent óumbeðin á hvaða teig sem er, helst í miðri aftursveiflu.

Atvinna

Kylfusveinn óskast í golfferð til Spánar í apríl. Starfið felst í því að bera pokann, finna boltann og segja „þetta var óheppni“ að minnsta kosti þrisvar á hverri holu. Laun: sólarvörn og ævarandi þakklæti.

Þjónusta

Tek að mér að útskýra fyrir maka hvers vegna níu holur tóku fimm klukkustundir. Fullum trúnaði heitið.

Til sölu

Fullt golfsett með poka og kerru. Selst vegna þess að eigandinn er hættur í golfi, í fjórða sinn á jafnmörgum árum. Auglýsingin verður tekin niður í apríl.