Framtíð LIV ræðst í dag og Íslendingarnir leika annan hring á Spáni

Samkvæmt gögnum úr gjaldþrotamáli LIV rennur frestur PIF út í dag. Sjóðurinn er stærsti lánardrottinn deildarinnar og ræður ferðinni í málinu. Financial Times hefur greint frá því að um 15 kylfingar hafi samþykkt með fyrirvara að leika í LIV Golf 2.0, en nöfn þeirra hafa ekki verið birt. Málið verður næst tekið fyrir hjá Michael Kaplan dómara í New Jersey 5. nóvember.

Dagbjartur Sigurbrandsson og Ragnar Már Garðarsson léku báðir á 67 höggum á fyrsta hring 2. stigs úrtökumótsins á Isla Canela Links og eru jafnir í 12. sæti. Sigurður Arnar Garðarsson er jafn í 61. sæti á Fontanals-vellinum í Girona. Þeir leika allir annan hring í dag.

• Karl Vilips frá Ástralíu lék fyrsta hring Mexico Open á 62 höggum, sem er lægsta skor hans á PGA-mótaröðinni. Hann fékk tíu fugla þótt hann hefði verið lasinn í nokkra daga. Kensei Hirata er höggi á eftir.
• Fifa Laopakdee frá Taílandi, sem vann Asia-Pacific Amateur í fyrra, hefur tveggja högga forskot á Nýsjálendinginn Cooper Moore eftir tvo hringi á Te Arai.
• Charley Hull og Miyu Yamashita voru jafnar í efsta sæti á 11 undir pari þegar þær voru hálfnaðar með annan hring á Maybank Championship í Kuala Lumpur.
• Annar hringur lokamóts HotelPlanner-mótaraðarinnar hefst á Alcanada-vellinum á Mallorca í dag. Joseba Torres er efstur á sjö undir pari.