Úr klúbbunum: Árgjald GG verður 49.900 krónur og Arnarholtsvelli lokað

Árgjald Golfklúbbs Grindavíkur fyrir árið 2027 verður 49.900 krónur. Það var ákveðið á aukaaðalfundi í golfskálanum á Húsatóftum laugardaginn 31. október. Skráning fyrir næsta ár er hafin á vef klúbbsins og núverandi félagar fá kröfu í heimabanka á næstu vikum. Þeir sem ætla ekki að halda áfram eru beðnir að skrá sig úr klúbbnum á vefnum svo að þeim verði ekki send krafa. Enginn annar klúbbur með 18 holu völl í samanburði Golfsins á árgjöldum býður fulla aðild fyrir minna en 50.000 krónur.

Golfklúbburinn Hamar á Dalvík lokaði Arnarholtsvelli fyrir veturinn 21. október. Frostið á vellinum hafði þá farið yfir fimm gráður og klúbburinn vildi hlífa sverðinum svo völlurinn kæmi sem bestur undan vetri. Í haust hefur ný svunta verið tyrfð í kringum 3. flöt með aðstoð sjálfboðaliða og nýir teigar mótaðir á 7. holu.

Í Vestmannaeyjum var holum 13–18 á Vestmannaeyjavelli lokað fyrir veturinn 22. október. Á holum 1–12 er leikið inn á sumarflatir meðan aðstæður leyfa.