Andrea á pari eftir fyrsta hring á Terre Blanche

Andrea Bergsdóttir úr GKG lék Le Riou-völlinn í Tourrettes í Suður-Frakklandi á 72 höggum, pari vallarins, og er jöfn níu öðrum í 22. sæti eftir fyrsta hring af þremur. Natalie Armbruester frá Sviss er efst á fimm höggum undir pari, höggi á undan sex kylfingum.

Ragnhildur Kristinsdóttir úr GR lék á 75 höggum og er jöfn í 48. sæti. Hulda Clara Gestsdóttir úr GKG lauk hringnum á 77 höggum og er jöfn í 69. sæti. Hún er í 7. sæti stigalista LET Access, síðasta sætinu sem veitir fullan keppnisrétt á Evrópumótaröð kvenna, og því er mest í húfi hjá henni af íslensku konunum. Guðrún Brá Björgvinsdóttir úr Keili lék á 79 höggum.

Annar hringur er leikinn á föstudag. Hulda Clara fer af stað kl. 07:09 að íslenskum tíma og Guðrún Brá kl. 07:31, báðar af 10. teig. Andrea hefur leik kl. 10:52 og Ragnhildur kl. 11:14.