Hvaleyrarvöllur opnaður aftur fyrir félagsmenn Keilis

Keilir greindi frá þessu á vef sínum á föstudag. Rástíma má bóka í GolfBox eins og venjulega. „Starfsmenn vallarins eru í þessum töluðu orðum að taka nýjar holur og gera allt klárt,“ segir þar. Kylfingar eru beðnir að taka tillit til þeirra því að unnið er víða á vellinum.

Framkvæmdasvæðið við golfskálann, þar sem stækkun skálans hófst í byrjun október, er lokað kylfingum. Klúbburinn birti kort af tveimur leiðum frá skálanum niður á 1. teig. Ástand vallarins er metið daglega og breytingar eru tilkynntar í GolfBox og á Facebook-síðu Keilis.